الثلاثاء، 16 مارس 2010

الحمار وصاحبه


اربط الحمار مطرح ماصاحبه يقولك

تفتكروا دى سلبيه لما صاحب الشأن والمسؤل يطلب حاجه ممكن تضره

المفروض ننصحه ولا ننفذ تعليماته ماهو فى الاخر المسؤل الاول

اصل فيه ناس لما بيكونوا فى موقع المسؤليه بيكرهوا النصيحه

اربط الحمار مطرح ماصاحبه يصدر الامر

لو حتى قلك اربطه على شريط القطر


.

22 صدق اللى قال:

mony يقول...

فى اعتقادى يالاسع
ان ده يرجع لموقعك من صاحب الحمار
وكمان لعقليته وشخصيته
بس انا فى الاونه الاخيره بحس ان
المثل صح الصح

Ms Venus يقول...

هعمل اللى عليا واقول وجهة نظرى واوضح الضرر من مكان ربط الحمار

سمع سمع

مسمعش خلاص هو حر يتحمل النتايج بقى



تحية ليك يا لاسع

rony يقول...

شوف يا لاسع اهم حاجه انه يفتكر هو قاللك تربط الحمار فين وازاى
اصله ممكن يقولك اربطه وبعدين يقول انا مقولتش
او يجيلك صاحب تانى للحمار ويقول هو فى حمار يتربط كده
ويعاقبك على ربط الحمار لصاحبه الاولانى
وبعدين عايز تربط الحمار على شريط القطر
مش كفايه الجاموسه عايز الحمار كمان يشترك فى الجريمه
وبس خلاص

rony يقول...

نسيت اقولك
حمار ........حمار
بس صحيح غلبان
ليل ........نهار
ماشى فى كل مكان
عن صاحبه يشيل حمل تقيل
وعشان كده بيقولواأصيل
..................

خواطر شابة يقول...

مش كل الامثال يؤخذ بيها في امثال تدعو للسلبية ومنها المثل المطروح اليوم اللي ينفذه اللي عاوز يشتري دماغو انما اللي مايقدرش يشوف الغلط ويسكت عليه استحالة يطبقه

Tears يقول...

احيانا لو قلنا الحق و فهمنا صاحب الحمار بيزعل و نطلع احنا اللى غلطانيين بالذات لو هو اغبى من حماره عشان كده احسن ناخده على قد عقله

Tarkieb يقول...

على فكره المثل زي ما يحب صاحبه.....يعني صاحبه عايزه كده باقتناع وما يرتاح الا كدة .اما زي ما يقول فا دي متغيره...ممكن كدة وبكره حاجة تانيه....عشان كده تلاقي الناس في مصر مش مستنية تسمع دي عارفة البرادعي عايز ايه وح يعملو زي ما يحب .....واللبيب بالاشارة يفهم

richardCatheart يقول...

ههههههههه اه يتربط ماتطرح مايحب صحبه ولما نجيب احنا حمارنا الملاكى ونبقى اصحابه احنا كمان نربطه مترح مانحب
وكل واحد مسئول عن نتايج افكاره
وعلى راى المثل
اللى بيشيل اربه مخرومه بتشور عليه
وعلى راى المثل اخوه التانى
كييف التتتتتتتتتتت يجبله معلقه

اهو كله كيف هههههههههه

تقبل مرورى

MR.PRESIDENT يقول...

الأحسن أخد رأي الحمار .. وهوااا اللي يختار هوا احنا كمان هنكفر الحمار معانا .. مش كفاية المسئول عن اصدار الأمر

Desert cat يقول...

واضح ان صاحب الحمار مضحى بيه خالص لدرجة انه عايز يربطة على شريط القطر

ابتسامة حزن يقول...

طبعا انا مش مع المثل ده
ممكن يكون صاحب الحمار غلطان
فاحنا لو طاوعناه ف كلامه لأما بتكون سلبيه وتكبير دماغ
او نفاق وعدم معارضه ف
الرأي لمصالح شخصيه

الراوى يقول...

هو فعلا فى حمير كتير


واحد لاسع معدى

فاروق بن النيل يقول...

أستاذ / لاسع أفندى
هذه أول مرة"أتلسع"قصدى أتشرف بمدونتك
والحقيقة عندى سؤالان :
الأول:هوه الإنسان يعرف منين إنه ملسوع؟
ثانيا: فى عصرنا هذا اللاسع أفضل من العاقل مش كده؟
بخصوص مقالك لم أكن يوما مطبقا لهذا المثل وإذا كان رئيسى يطلب منى شيئا غير مقتنع به أنصحه أولا فإذا لم يقبل نصيحتى طلبت منه أن يكلف غيرى بهذا العمل وطبعا كانت النتيجة إضطهادى بكل شيئ ولكن فى النهاية لايصح إلا الصحيح هو نفسة إعترف ولكن فى حفلة
التقاعد لى منذ ثلاث سنوات .
لاتنسى أن تلسعنى واحدة من زياراتك لمدونتى ربما أتلسع زيك وارتاح من الفكر
farouksam.blogspot.com(عصفورالجنة)

الشـوكة الــنـاعـمـة يقول...

بص عارف المثل اللى بيقولك انا عبد المأمور
الغريب بقا ان المأمور نفسه يقولك انا ياباشا عبد المأمور
الله امال الحكايه ايه بقا
بص فى النهايه لايصح الا الصحيح مسؤل مأمور وزير غفير الصح صح واللى يقولك عليه ضميرك اعمله

طالبة مقهورة ..درجة أولى يقول...

مادام صاحب الحمار قال حاجة..يبقى ننفذها بعد ما نوضحله عواقبها

اصر..يبقى يستاهل اللي هيجرى لحماره ويقولي مين اللي هيجر الكاريته بعد كده

Desert cat يقول...

والله انت انصح صاحب الحمار لو مش قبل النصيحة يبقى اربط الحمار على شريط القطر حتى لو ربطته فى القطر مفيش مشاكل

momken يقول...

انا رئى

اربط الحمار مطرح مايقول الحمار


دى لو اعتبرنا الحمار التانى معجبوش رئى



لكن فى الاخر نقول

من حكم فى ماله فما ظلم


تحياتى

أحمد الصعيدي يقول...

السلام عليكم

كل سنة وانتي طيبة

العيسوى الصغير يقول...

و اربطه انا ليه ما يربطه هو

عمرو يسرى يقول...

فىاول تعامل هقول وجهه نظرى لو فى ضرر وعلى طريقه رد فعله هتصرف لحد مايتغير

Medus يقول...

فعلاً المثل دا بينطبق جداً على العاملين في المصالح الحكومية في مصرنا الغاليه..الموظف من دول عباره عن ........!! يؤدي الاعمال الملقاه على ظهره كما يريد صاحبه..المهم ان صاحبه (السيد المدير العام) يكون مبسوط وراضي عن سير العمل في المصلحة وان العباد من ذوي المصالح طالع عينهم يا ولداه
وصدق من قال اربط الحمار مترح ما صاحبه يحب

Boneta يقول...

المثل ده من الناحيه العمليه موجود واغلب الناس بقت بتربط الحمار مطرح ماصاحبه يحب علشان يشتروا دماغهم من تحمل المسئوليه ووجع الدماغ
وانا في رأيي انه مثل يدلل علي السلبيه وانا بطبيعتي مابعرفش اسكت يعني لما بشوف غلط بقول وأمري علي الله اهو ابقي عملت اللي عليً وريحت ضميري من ذنب الحمار وخلاص !!
تقبل مروري وتحياتي